ကမ္ဘာပေါ်ရှိအမေများအားလုံး လက်ဆယ်ဖြာထိပ်မှာမိုးလို့ ရှိခိုးလိုက်ပါတယ်။ ကံကောင်းထောက်မ စွာနဲ့ ကျွန်မမေမေက အနားမှာရှိ နေချိန်ဖြစ်တယ်။ တကယ်တော့ မေမေက သူရဲ့မြေးဦး ကလေးကိုကြိုဆိုဖို့ရောက်နေတာပါ။ ကျွန်မကတော့ မေမေ့အနားမှာ နေခွင့်ရလို့ အရမ်းဝမ်းသာမိတယ်။ မေမေ့ရဲ့ ကျေးဇူးတွေပြန်စဉ်စားလိုက်ရင် ဆပ်လို့ မကုန်နိုင်။
တကယ်တော့ မေမေဟာ ကျွန်မကိုမွေးပြီး ၆လမှာပဲ ကျွန်မရဲ့ဖေဖေနဲ့ လမ်းခွဲခဲ့ကြတာပါ။ ကျွန်မအထက်မှာ အစ်ကိုနှစ်ယောက်ရှိပြီး ကလေး ၃ ယောက်ကိုမေမေ ရှာကျွေးခဲ့ပါတယ်။ ကျွန်မကိုမွေးပြီး ချိန်မှာ မေမေ အသက် ၂၅ နှစ်သာရှိပါသေးတယ်။
အစ်ကိုအကြီးဆုံးကိုတော့ မေမေရဲ့ ဒုတိယ အစ်မဆီမှာထားပါအပ်ထားပြီ အစ်ကိုအလတ်ကတော့ မေမေရဲ့ အမေ ကျွန်မတို့ ရဲ့ အဖွားဆီမှာပေါ့။ ကျွန်မကတော့ မေမေရဲ့ အစ်မ အစ်ကြီးဆုံးဆီမှာ နေခဲ့ရပါတယ်။
မေမေက အရောင်းအ၀ယ်အလုပ်ကိုလုပ်ခဲ့ပါတယ်။ တချိန်ကမော်လမြိုင်မှောင်ခိုခေတ်စား ချိန်ပေါ့ မေမေက သားသမီးတွေ မျက်နှာမငယ်ဖို့ ငွေကိုရှာပြီး အားလုံးပြည့်စုံ လုံလောက်ဖို့ ပို့ပေးခဲ့တယ်။
အခုချိန်ထိလည်းမေမေက အလုပ်လုပ်နေတုန်းပဲ လယ်လုပ်တယ်၊ ကျိုက္ကသာ ဆိပ်ကမ်းဈေးဆိုင်လေးနဲ့ သားသမီးတွေထောက်ပံ့ငွေကို စောင့်ဖို့ မလိုတဲ့အခြေအနေတစ်ခုနဲ့ နေနေတယ်။ သားသမီးတွေ ပို့ရင်လည်း မေမေကတော့ ကိုးတောင်ပြည့် ဘုရားတည်လိုက်တယ်၊ မေမေလေ သမီးတို့ပို့တဲ့ငွေနဲ့ပေါင်းပြီး ဘုရားစောင်းဒါန်းလှူတယ်… စသည် စသည် ဖြင့် မေမေ လုပ်ခဲ့ပါတယ်။
သမီးကတော့ ငယ်စဉ်အချိန်က တစ်ချို့သောကိစ္စတွေမှာ မေမေကို စိတ်ဆင်းရဲအောင်၊ စိတ်ညစ်အောင် နားမလည်မှု့မပေးနိုင်ခဲ့တာတွေရှိခဲ့ပါတယ်။
အခုအချိန်မှာတော့ မေမေ့အပေါ် သမီး အားလုံးမဟုတ်တောင် အားလုံးနီးပါးနားလည်ပြီး မေမေ့ကိုစိတ်ချမ်းသာ ဖို့ သမီးစဉ်စားတတ်လာတယ်။
ခင်ပွန်းသည်ကို ကျွန်မ အိမ်ထောင်စကျခါစကတည်းက ယနေ့ထိပြောနေဆဲ စကားကတော့ မိဘ၊ ညီကိုမောင်နှမ ဆိုတာ အစားမရနိုင်ပါ။ ပေးပါကျွေးပါလို့ ကျွန်မပြောခဲ့ပါတယ်။ ဘာဖြစ်လို့လည် ကျွန်မကိုယ်တိုင် တန်းဖိုးထားတဲ့အရာတွေဖြစ်လို့လေ။ ယောက်ျား၊ မိန်းမ ဆိုတာ ထပ်ယူလို့ရပါတယ်။ မသေခင်ကျွေးကြဖို့လို့ပါတယ်။ သေမှတော့ ငိုမနေကြပါနဲ့။
ကျွန်မအတွက်တော့ ကျွန်မမေမေက ဘုရားပါပဲ။ ကျွန်မ မေမေကို သိပ်ချစ်တယ်။ ဒီပိုစ့်လေးနဲ့အတူ မေမေ ကို လက်ဆယ်ဖြာထိပ်မှာမိုးပြီး ကန်တော့ပါတယ်။
No comments:
Post a Comment